「二撇雞」財爺後生一面鬚

【明報專訊】財政司長曾俊華家係「二撇雞」，後生時原來係大鬍子。佢年輕時除咗練拳打劍，仲會彈結他夾band。財爺接受《公務員通訊》訪問，分享自己嘅興趣，仲有佢年輕嘅有型相。呢位自喻為中產嘅財爺，話工作好忙，所以珍惜周末時光，陪太太同家人睇戲飲茶，通訊仲刊出佢飲茶食蝦餃嘅相片，有圖有真相，莫非要證明自己過緊中產生活？


財爺年輕時留學美國讀建築，其後進修公共行政。佢話，求學期間，博覽米爾頓、馬克吐溫、海明威及陀思妥耶夫斯基等名家著作，培養終身閱讀嘅興趣。


講番工作，佢話美國2015年前可能加息，屆時難免對本港物業市場重大衝擊。佢亦領導政府嘅房屋用地供應督導小組，過去兩年努力搵地，話可以保證，政府有信心兌現建屋目標。


料美國2015年前加息

財爺嘅上司特首梁振英，搞經濟發展委員會話要推動產業，財爺就話，佢嘅工作目標係推廣香港嘅國際金融中心地位，謹慎理財，面對外圍風險，認為2013年「我們應專注發展香港的傳統強項」。財爺嘅言論，唔怪得成日被人話同特首唔對嘴型。