假酒疑雲 唐唐喊冤

【明報專訊】前政務司長唐英年（唐唐）拍賣珍藏，套現約4000萬元，不過就惹來「假酒」風波，原來有外國酒評家喺評酒論壇撰文 ，質疑3批次葡萄酒嘅真偽，拍賣行佳士得即刻臨時抽起其中估值達70萬元嘅一瓶1971年La Tache Grand Cru葡萄酒。唐英年就大呼無辜，堅持呢批酒係20多年前透過英國著名代理購入，仲有文件證明紀錄，無理由懷疑佢呢批珍珠係假貨。佳士得話，公司政策唔賣假貨，抽起拍賣品，只係要做預防措施咁講。


唐唐收埋大量佳釀，透過佳士得拍賣810批次嘅珍藏，上周六拍賣時，全場單一瓶最貴、估價達70 萬元嘅La Tache Grand Cru，拍賣官喺開拍前突然撤回，當時未解釋原因，公關嗰時輕描淡寫咁話「並非特別事」。


唐唐：經著名代理購入 有證明

《南華早報》噚日報道，原來有外國酒評家喺評酒論壇撰文，懷疑唐唐有3批次嘅酒有問題。不過，佳士得只抽起189批次，其餘被指有問題嘅256批次（12瓶）及165批次（3瓶）照賣，前者賣到84.7萬元，後者24.2萬元，高於原先估值。


佳士得﹕三箱酒係真品

佳士得回覆Emily，話佢哋政策係唔會拍賣任何佢哋知道或有理由相信係不真實或仿冒嘅拍賣品，仲話佢哋有權威專家驗證。公司發言人又話，「到目前為止，依據所得到的資訊，我們認為這三箱紅酒為真品。撤回189號拍品純粹是在澄清與確認的過程期間採取的預防措施」。