網友質疑九巴語言偽術

【明報專訊】九巴前日加價，平均加幅4.9%，但話明呢個係平均數，有啲線路嘅加幅唔止4.9％。有網民嘗試計算九巴多條路線加幅，佢哋質疑九巴特別日子行駛嘅9條路線，以及同城巴、新巴嘅聯營過海路線唔加價，拖低平均加幅，於是話4.9%只喺「語言偽術」，惹起網上熱議，究竟網民啱唔啱？


Emily問九巴同政府，佢哋就話唔係咁計。網民條數係咁計嘅，剔除「零加幅」特別路線，同埋九巴、城巴、新巴嘅聯營過海路線，發現平均加幅達5.62%，比之前宣布嘅4.9%高0.72個百分點；一啲長途路線，例如來往將軍澳及美孚嘅98C，就加多過6%去到10.1元，網民話懷疑有人利用少人搭嘅路線唔加價，製造加幅細假象咁講。


九巴﹕加權計出加價4.9％

九巴就話票價調整機制用加權方式計，計出嚟一定係行會批准嘅4.9%，計法亦與簡單平均方式計唔同。運輸署亦話，條數根據九巴每條路線票價實際加幅同乘客量計出嚟，仲話因為唔想乘客混淆，先至將聯營過海路線嘅車費維持不變，而條條路線嘅加幅亦都唔同。講咗咁耐，Emily都搞唔清平均加幅條數點計，如果可以公開成盤數就好啦。