華人聯國高官：民主國家也有貪污

【明報專訊】曾任中英聯合聯絡小組中方首席代表、外交部港澳台司司長嘅吳紅波，家貴為聯合國主管經濟和社會事務嘅副秘書長，身分雖然唔係中方代表，但講到香港政制發展，都要分享一下意見。講到民主制度，佢話見過有國家嘅選舉制度同美國一樣，但就被評為全球貪污最嚴重國家之一，所以各地都唔能夠照抄西方一套應用喎。


曾任外交部港澳台司長

吳紅波噚日出席中華能源基金委員會舉辦嘅午宴，被人問到香港政制發展，佢話作為聯合國高級官員，唔應該評論個別地區嘅政治發展，但願意分享作為外交官嘅觀察。


吳紅波舉例，曾到訪過一啲國家，政治制度同美國一樣，都係一人一票選舉，但就被「透明國際」（Transparency International）評為全球貪污最嚴重國家之一。佢話其中原因，係該國缺乏成熟嘅公民社會，選民於是投咗票畀聲稱畀好處佢哋嘅候選人。


吳紅波話，無論香港未來點發展，都必須符合本身情况，相信港人同特區政府會有智慧解決問題咁講。