建制論壇 記者多過觀眾

【明報專訊】標榜愛國愛港嘅「愛中港青年文化社團聯會」成立短短一個月，眼見咁多青年「無殼蝸牛」，噚日喺金鐘政總東翼廣場搞咗個房屋論壇，仲請咗中原地產創辦人施永青做講者，Emily去趁熱鬧，點知到3點半開場，10多個記者同攝記到晒，全場觀眾只有小貓三四隻，就連嘉賓高達斌都「失蹤」，論壇最終遲咗4個字先開始，早咗成個鐘就完。


講者施永青唱反調

聯會主席楊君豪，預先擺住「撐CY普選連任特首」、「支持中策組為CY護航」嘅易拉架，青年民建聯主席周浩鼎亦出任嘉賓，大讚CY用心搵地建屋，可惜都吸引唔到CY粉絲撐場，只有幾個聽眾，工聯會潘佩璆都有中途加入。


施永青一開口就大唱反調，話自己同CY嘅房屋政策見解完全唔同，認為早前政府多次出辣招打擊樓市「又難行，又危險」。佢話政府向現存樓宇出招，令全部樓價下跌，長遠會影響經濟，所以應該向新增樓宇埋手。佢建議規定新起住宅將約一半單位賣畀首次置業嘅港人，因佢哋負擔能力有限，地產商嘅售價都會低，並建議每年提供約1萬個單位先可幫佢哋上樓。