維園阿伯自稱患末期癌

【明報專訊】自從梁振英（CY）上台做特首，愈嚟愈多撐CY組織出現，好似愛港之聲、愛護香港力量，而每個禮拜日港台《城市論壇》，「維園阿伯」繼續粉墨登場。但Emily噚日聽到一個壞消息，民建聯成員、出席論壇近20年嘅「維園阿伯」許金池，喺節目中自稱患咗末期癌症，唔知仲嚟得幾多次講嘢，話要向所有支持者「致萬二分謝意」。


「佢好守規矩」

據Emily了解，年過80嘅許伯同朋友講自己身患肺癌、淋巴癌等4種癌症，情况幾嚴重，不過佢唔多諗住醫治，話寧願搵啲好嘢食。Emily搵唔到許伯求證，同佢交手多年嘅主持謝志峰，話聽到呢個消息好難過，即刻安慰佢。


許伯1993年已經加入民建聯，算係資深黨員兼城市論壇忠實擁躉。對於呢個「老對手」，謝志峰諗番前幾個禮拜，佢身體已經明顯消瘦。謝志峰話雖然許伯論調單一，但係好守規矩，大家出發點都係想香港同內地平和發展。


謝志峰話已經約咗許伯下個禮拜做完節目後食餐飯，又諗住搵埋不同政見嘅各路朋友，喺港台餐廳擺番兩三圍水酒聚一聚，祝佢身體健康，Emily相信呢個願望所有讀者都會支持！