林煥光﹕喺平機會3年最有意義

【明報專訊】前食物及衛生局長周一嶽下月就會接任平等機會委員會主席，但自政府公布呢個消息之後，有傳媒同團體幾乎日日對呢個任命口誅筆伐，搞到現任主席林煥光（後排右二）噚日要出嚟幫周一嶽講句好話。林煥光話周一嶽其實幫弱勢社群做咗好多年義工，叫大家畀啲時間佢，相信周一嶽會做好呢份工作。


叫市民畀時間周一嶽

林煥光噚日去旺角行人專用區，出席一個有關消除種族歧視嘅論壇，佢會後被記者追問周一嶽嘅任命，佢相信周接任後就可以展示佢嘅能力。至於自己即將離任，林煥光就有啲感觸，話自己做咗多年公務工作，喺平機會嘅3年先係最有意義嘅工作，但遺憾仲有好多工作未做完，唯有寄望周一嶽將工作做好。周一嶽嘅任期下個月生效，任期3年。