新同盟：唔認民主黨私定時間表

【明報專訊】雖然泛民成日話要團結爭普選，但睇嚟佢哋之間嘅矛盾唔係咁易解決。話說人民力量早前表明有條件地加入真普選聯盟，但民主黨主席劉慧卿回應，唔同意人力喺討論政改前就提條件，而多次批評民主黨嘅新民主同盟，則加入鬧民主黨行列。


新民主同盟質疑卿姐咁講，等於將真普聯淪為「民主黨私人俱樂部」，只有「無條件接受民主黨立場」嘅人先可加入，仲重申佢哋加入真普聯要堅持嘅原則，包括唔可以排斥任何政黨加入聯盟，同埋要唔排除討論2016年普選立法會，仲強調佢哋一直都唔承認「民主黨與中共『私定』2017及2020年嘅『所謂普選時間表』」。


民主黨：時間表係人大決定

新同盟嘅言論似乎令民主黨好憤怒，後者即時發聲明反駁，話真普聯召集人鄭宇碩都講過，希望參加聯盟嘅團體唔帶任何條件加入，况且2017同2020年嘅普選時間表係人大常委會2007年作出嘅決定，完全同民主黨無關，要求新同盟搞清咗事實先好發表評論喎。


新同盟議員范國威晉身議會後，話過要做泛民嘅「漿糊」，團結激進同溫和勢力。Emily呼籲雙方一人少句，做實事好過。