大升市成績 陳鑑林賺咗架車

【明報專訊】上星期股市狂升，成交額好大，街頭巷尾都聽到唔少人討論股市，唔少人都有啲斬獲，立法會議員亦唔例外，好似一向投資有道嘅民建聯立法會議員陳鑑林，亦透露自己都賺咗啲，但呢幾日大升市，佢無入貨亦無沽貨，只係繼續持有過去買落嘅股票，帳面上賺錢啫。


張華峰估港交所上500元

陳鑑林唔肯講自己有無賺到一層樓咁多錢，但最近買咗架全電動車嘅佢，就承認股市斬獲都差唔多等於新車價錢，Emily聽聞佢部全電動車要70幾萬元，即係佢最少都賺咗幾十萬啦。自由黨田北俊就話自己都持有港交所等股票，但佢從來都係長線持有，所以唔會因為家升市而沽貨。問到佢港交所邊個價位入，田少話自己都唔清楚，因為股票從來都係田太負責嘅。


不時向人推介港交所嘅金融服務界議員張華峰，噚日就話估計港交所仲有得升，隨時升上400、500蚊（噚日收報285.2元）。相信呢排股市咁旺，佢都賺到盤滿鉢滿。