曼怡BB幫手解圍

【明報專訊】噚日立法會財委會討論開設為期3年嘅首席經濟主任職位，政府經濟顧問陳李藹倫話，增設職位要加強政府嘅經濟研究能力。泛民就質疑，呢幾年貧富懸殊、樓價高企，政府經濟研究能力唔掂，點解仲要開位。好彩財庫局常秘謝曼怡同做過AO嘅葉劉淑儀出聲，陳太最後先倖免於難。


郭家麒咬住唔放

公民黨郭家麒質疑，香港呢幾年堅尼系數持續高企，樓市係咁升，質疑政府計數咁差，點解要開位。民主黨主席劉慧卿亦話，政府經濟辦公室仍然係「舊團隊」，有冇預警過政府有呢啲問題。


陳太解釋，2009年金融海嘯後，政府其實已有計數，仲喺2010年增加土地供應。郭家麒咬住唔放，認為政府應確保計出嘅數據，可以反映喺政策入便，咁開新位先至有用。劉慧卿亦話樓價已激到市民紮紮跳，點可以話「將有成果」。


可能見唔對路，「曼怡BB」終於出手，佢話呢個職位編制只提供數據，政策應問政策局。


葉太亦認為「樓市問題你追究陳太唔公道」，要追究就應追究特首同更高級官員，財委會主席張宇人亦話郭家麒離題。郭家麒話，佢同陳太無怨無仇，只希望佢嘅意見能幫到政府解決問題。