無綫攻破收視「四六開」

【明報專訊】亞視早前引述港大民意研究計劃嘅調查，話自己同無綫嘅收視有「四六開」；反對發新牌嘅無綫，近排又搵港大做調查，結果同亞視所講嘅完全唔同，雖然的確有五成人睇過亞視，但睇無綫都有九成，唔係四六開。


千人受訪 九成睇無綫

無綫喺上年12月至今年1月，搵港大民意研究計劃訪問咗成千人，結果93.9％被訪者話自己喺過去一星期曾收睇無綫電視節目，睇過亞視嘅有55.6％，睇有線嘅亦有31.1％，now寬頻就少啲，21.9％，而香港寬頻就有8％睇過。


香港寬頻係申請緊電視牌嘅城電主席王維基創立，王維基已賣咗寬頻，但呢個台睇嘅人唔多，無綫嘅調查就話，有三分之二受訪者認為政府應該以申請機構現有節目質素，作為發新牌標準。


立法會上年叫政府要喺3月交代發牌，無綫動作多多，除咗做調查，佢嘅司法覆核亦會喺呢個月27日開審，睇怕發新牌喺呢個月都未必有聲氣。