馮檢基撞花李慧琼座駕

【明報專訊】立法會停車場地方唔細，車亦唔多，但意外都係會發生。民協馮檢基前日喺停車場內，被指車尾撞花民建聯李慧琼（Starry）架車嘅車頭「泵把」，最終同車主、即係李慧琼老公傾掂數，畀對方4000蚊「賠住先」。


噚日Starry話呢件事係小碰撞，唔想多講細節，話既然已經傾掂，就唔好再糾纏喇，只係話商談賠償過程中同阿基係「有商有量」嘅。


Starry話其實呢啲係停車場時有發生嘅交通意外，佢部車被撞花嘅位置，約有一個兩蚊銀嘅闊度，「泵把」被撞花。Starry話車被撞當然心痛，始終要拎去整，但原來佢唔會揸車，自己雖然有牌，但上次揸車已經係考牌嗰時，佢話2008年做咗立法會議員後無耐就考牌，都要考兩次先及格，但認為自己生手，都係唔好勉強，老公亦唔想佢揸車，希望減少壓力喎。Starry仲話搭港鐵好方便，自己成日搭。