咖喱飯搶閘少交稅被罰

【明報專訊】「保衛香港自由聯盟」噚日喺中環擺街站，叫人喺4至5月交第2期薪俸稅時記住少交10蚊，從而發出不滿政府施政嘅信息咁話。參加聯盟嘅新民主同盟立法會議員范國威（綽號咖喱飯）都樂意參加，不過佢有啲大頭蝦，人哋叫佢第2輪先至少交，但佢「搶閘」今年1月第1期就唔交，結果被罰咗300幾蚊。


咖喱飯同Emily解釋，如果第1期遲交薪俸稅，罰款係計埋少交嘅稅，連同第2期稅款嘅5%，遲交第2期先至係罰遲交款項嘅5%，即係遲交10蚊要罰5毫。佢話，第2期會繼續遲交，希望以此癱瘓政府，同埋為「佔領中環」運動循序漸進訓練咁話，又話稅局追數行政費用遠超嗰5毫子。


韓連山反彈10磅

另外，聯盟發言人韓連山因為已經退休，所以會叫老婆同朋友遲交稅。佢話，上年至今，呢項活動已有1萬人簽名，如果佢哋全部遲交就算成功。


韓連山上年反國教時曾絕食171個鐘，輕咗15磅，Emily噚日見佢中氣十足，似乎已恢復。韓連山同Emily講，因為絕食咁耐，個胃縮細咗，好似有嘢頂住咁，唔敢食咁飽，更兼食少咗煎炸嘢，所以就算家重番10磅，距離原磅數仲爭少少。