關焯照：從無答過

【明報專訊】內地官方人民網噚日以「內地居民10年港澳自由行﹕為港人貢獻3成薪酬」為題，轉載《人民日報》海外版一篇文章，呢篇原題為「10年自由行 兩地皆受惠」嘅長文講到自由行同一簽多行，文中有一段係咁嘅﹕「按當地經濟學家關焯照的說法，自由行至少帶動香港1至2個百分點的經濟增長率，相當於為港人貢獻了人均1/3的薪酬」。


不過，關焯照對有關報道一頭霧水，佢同Emily講，肯定自己無答過有關薪酬問題，皆因「都唔知點計出嚟，點識答呀」。


「都唔知點計出嚟，點識答」

對於呢篇報道，關焯照話依稀記得喺上年接受過內地傳媒訪問，問佢對內地一簽多行嘅睇法，但肯定無講過「自由行為港人貢獻三成薪酬」，只記得話旅遊業由2003年佔整體本港GDP嘅3%，增加到2011年嘅5%，根本無提過自由行帶動經濟增長率。佢苦笑話，家畀全城追討，都唔知發生咩事。不過，佢話曾經提及2003年至2011年間，旅遊業為香港創造咗7萬至8萬職位，唔知對方有無用嚟推算薪酬比例，但自己就點都計唔到。


指一向建議取消一簽多行

關焯照同Emily講，自己一向建議取消一簽多行，認為一日嚟兩三次嘅多數係水貨客，搞到部分地區嘅必需品價格飈升，相信取消政策都唔會對經濟有太大影響咁話。