林大輝嫁入公民力量

【明報專訊】立法會工業界議員林大輝早已表明有興趣跳出功能界別轉戰直選，早前更話告別「單身」，希望入黨。大輝人緣好，又被視為全國政協常委唐英年嘅「家臣」，有傳自由黨同新民黨都先後向佢伸出友誼之手，但一直都冇下文，Emily聽聞，大輝千揀萬揀下，終於決定加入公民力量喎。


部署直選？大輝神秘

Emily噚日搵大輝求證，佢對呢樁「喜事」直認不諱，透露自己係應前沙田區議會主席韋國洪邀請，今年1月1日正式加盟公民力量。佢話，自己喺上屆區議會會期認識公民力量，同公民力量嘅姚嘉俊、梁家輝同潘國山等區議員仲係多年好友。至於係咪積極部署參與區議會及立法會直選，大輝就保持神秘。


公民力量喺沙田區相當有實力，樁腳之多絕對不下於民建聯，大輝以公民力量牌頭參選嘅勝選機會應該大增。難怪明明身處北京嘅佢，上個禮拜都特登返港，幫參與田心區議會補選嘅潘國山拉票啦，原來大家已經係黨友！


除咗公民力量積極擴充，據聞經濟動力亦好努力開拓新界東嘅版圖，招攬包括沙田鄉委會主席莫錦貴在內嘅鄉紳加盟，但成唔成事就要等吓先知喇。