CY避談佔領中環

【明報專訊】特首梁振英（CY）唔止被指「語言偽術」一流，避答技巧都唔簡單，噚日佢主持嘅經濟發展委員會記者會，有兩名記者都趁機問到近期佔領中環嘅討論，CY都迴避咗。記者第一條提問就問佔領中環，CY直接話呢個話題同經濟發展委員會無關，其他場合再答。之後有記者再問，CY就技巧得多，話剛才咁多位專家學者同業界都冇人提過政改同佔領中環。


CY叫阿John 阿John呆一呆

有記者提到財政司長曾俊華喺預算案中結尾講「你有你的生活，我有我的忙碌」，問兩人嘅工作關係，CY望一望坐喺旁邊嘅鬍鬚曾，然後拎住本預算案讀出財爺開頭講以財政資源全面配合自己政策嘅段落。


雖然梁振英答咗等於冇答，但有記者問到經濟發展委員會程序同埋六大優勢產業嘅提問時，梁振英答咗幾句程序後，無端端講咗句﹕「John（曾俊華）」，曾俊華呆咗一呆，先意會係CY叫佢答有關六大優勢產業。唔知大家覺得兩人工作係咪好有默契呢。