廉航上賣車 網民唔睇好

【明報專訊】飛機上賣香水、手表已經係司空見慣，但有冇聽過賣車？以超低價機票起家嘅內地民營航空公司春秋航空就話，最快下個月乘客就可以喺萬里高空上買車。雖然公司仲未公布賣嘅係邊款車，但就講定價應該差不多喺10萬蚊人仔一部。


機上簽意向單 落地憑單買車

春秋初步嘅設想係喺航班上對車型進行介紹，旅客若考慮買，就簽下意向單，落地之後憑意向單去汽車4S店買車，就可以有折扣優惠。當然，如果乘客願意喺空中碌卡買單，都可以即時畀晒所有款項或者做分期。


其實，春秋2011年就有呢個創新想法，當時除咗話要賣車，仲要賣房。惟當年車市樓市暢旺，一個巴掌拍不響，搞下搞下冇咗聲響。過咗2年計劃得以翻生，但內地網民仍然唔睇好。有人話咁做會嘈到乘客休息，有人講坐廉價航空嘅人點會買車呢，不過都有人支持春秋力圖多元化收入來源嘅努力。