明報新聞獎冠全行

【明報專訊】香港報業今年第一份成績表噚日派出，《明報》嘅同事連續第二年豐收，喺香港報業公會嘅「2012年香港最佳新聞獎」比賽，一口氣攞咗12個獎，包括4個冠軍同4個亞軍，係獲得冠軍最多嘅參賽報館。Emily代表得獎同事講一句﹕多謝讀者嘅支持、大會嘅支持。


獲4冠軍 共12獎

上年係香港選舉年，明報偵查組同事先後爆出「揭發唐英年僭建地庫系列」同「揭發梁振英山頂大宅僭建系列」兩大獨家新聞，行家個個都要跟進，兩單嘢到家都仲未埋尾，影響力之大可想而知。呢兩單新聞奪得「最佳獨家新聞」冠、亞軍，同「最佳新聞報道」冠軍。


唐梁僭建報道影響深遠

至於第三個冠軍，同事周偉強、屈俊樂、覃純健、吳光熙聯合採訪嘅「不當商業行為系列調查報道」，奪得「最佳經濟新聞報道」。入職唔夠一年嘅新同事陸文，就憑佢上年採訪內地維權人士李旺陽家人、溥儀侄女同香港無名善長仁翁等3篇新聞，攞到2012年「最佳新人」冠軍。


獎項成12個咁多，Emily篇幅所限，唔可以喺呢度全部講晒，做咗大表喺隔籬畀大家睇。可以見到，攞獎嘅同事嚟自編輯部唔同組別，有偵查組、港聞組、經濟組、編輯組、攝影組、體育組、星期日副刊組等，可見《明報》人才濟濟，為讀者炮製好新聞、好相片、好內容。