麥記下周一「派大包」

【明報專訊】唔少研究證明食早餐有益，麥當勞就決定搞個「全港早餐日」，下周一喺全港約230間麥當勞派煙肉蛋漢堡。麥當勞話，已經預咗20萬個包，為顧客送上一個「十分Good Morning」咁話。


麥當勞嗰邊同Emily講，今次係香港麥當勞第一次免費派包。至於揀煙肉蛋漢堡，佢哋話因為呢個係好受香港人歡迎嘅早餐之一喎。Emily睇過，煙肉蛋漢堡每個單售15蚊，每個熱量297卡；一個人每日所需嘅熱量，大概係1500至2000卡。


今次活動除咗山頂廣場、馬場、海洋公園同機場等，全港麥當勞都參加，每間派1000個，朝早6點開始，每人限取一個。亞洲同中東等30個國家都會一齊派，足足會派500萬個包。