陳淨心「打人國保」當國寶

【明報專訊】被稱為「潮州辣妹」嘅愛護香港力量召集人陳淨心，同佢個綽號一樣，言論一直熱辣。佢早排上香港寬頻節目《大議題》，談及香港記者喺內地被打，同場嘅時事評論員程翔質疑打記者嘅人係「國保」，點知陳淨心話「我淨係知道熊貓係『國寶』」，又話程翔將呢單嘢入國家數係唔客觀。Emily聽後唔知笑定喊，或者「國保」真係等同國寶啦。


話入國家數唔客觀

陳淨心話，任何時候都唔應該郁手郁腳打人，不過轉頭就話，好多國家對政治、國防、外交，「好似話需要申請」，跟住又話「係咪劉曉波……喺國家角度係政治犯，妻子劉霞被國家特別照顧，牽涉政治嘅嘢，應該要申請」，質疑「可唔可以攞住記者證衝入美國國防基地、中南海採訪？」主持即刻反駁佢，話當時記者企喺外面就畀人打。


Emily諗，莫非劉霞住所與美國國防基地同中南海「齊名」？節目尾段，程翔都忍唔住話「你要了解情况先至好嚟講嘢」。