中產財爺：打過地盤工

【明報專訊】月薪37萬嘅財政司長曾俊華兩個禮拜前宣布預算案時自稱中產，原來佢都做過地盤，體驗過工人辛酸，佢噚日喺網誌撰文話「中環價值」喺本港根深蒂固，年輕人同家長自然較少思考核心商業區以外嘅發展機會，而要改變呢種情况不能一蹴而就，要慢慢讓大眾接受「行行出狀元」可以有好闊定義。


財爺噚日以〈不一樣的CV〉為題撰文，講佢當年喺麻省理工學院時主修建築，搵暑期工時揀咗去地盤做建築工人，人工係當時美國最低工資嘅5倍。財爺話當時要將每塊重70磅嘅石膏板由地面逐層爬樓梯搬到樓上，大隻同事每次搬兩塊都唔使休息，佢自己出盡氣力都只能每次搬郁一塊，等同事做完嘢喺天台歎啤酒聽音樂時佢都未搬完。


倡搵木村做船員 推銷航運業

財爺話，自己嘅CV（履歷）包括喺老人院做打雜、起診所教書，同加入政府後嘅工作風馬牛不相及，但就有機會由不同角度認識世界，絕對唔差過大企業嘅工作經驗。


早前特首梁振英喺《施政報告》話要發展航運，財爺仲獻計話，見到近年拍攝介紹飛機師嘅電視劇好受歡迎，建議製作人搵木村拓哉或劉華扮演英氣船員，吸引年輕人投身海運行業咁話。