陳家洛5仔女輪住病

【明報專訊】公民黨陳家洛同郭榮鏗（Dennis）喺海怡半島嘅議員辦事處噚日正式開幕後，家洛噚晚就去日內瓦開聯合國人權委員會，不過佢屋企有啲煩，因為佢嘅4位千金同細仔齊齊病晒，無得好似以前咁排排企支持老竇喇。佢話早排因為轉季，一個中完招就到另一個，4個女輪流發燒同咳，跟住細仔又因為出3隻牙而發燒，搞到家洛頭都大埋。


至於家洛嘅戰友Dennis，佢前年區選參選海怡半島但戰敗，噚日就返海怡半島同家洛開議辦，下個月仲會同黨友郭家麒喺東涌開議辦。


另外，Dennis同前政務司長陳方安生等人搞咗個民間策發會，沉寂咗一段時間，今日會開預備會議。Dennis話佢哋希望邀請支持民主嘅商界，睇吓點樣同泛民新平台分工合作，或者會改個新名「重新出發」，又話陳太有啲新諗法喎。