馬英九大女婚後居港

【明報專訊】台灣總統馬英九喺香港出世，估唔到佢同香港仲係「餘情未了」！講緊嘅係佢個曾被譽為「全球最美第一千金之一」嘅大女馬唯中，原來32歲嘅佢上年已經嫁咗畀同為台灣人嘅美國哈佛大學學長，而佢夫婿就喺香港返工，所以佢已經「嫁雞隨雞」到咗香港定居喇。


台灣夫婿 香港返工

馬唯中夫婦前晚喺台北圓山飯店低調補擺喜酒，只係開咗8席，之所以喺圓山金融廳結婚，係因為新郎父母當年亦喺呢度結婚，但原來雙方父母都係第一次見面。馬英九太太周美青同細女馬元中當然有出席喜宴，但馬英九就因為要處理上周六嘅反核大遊行，做咗新翁都出席唔到。台灣啲行家話，馬唯中噚日喺桃園機場離開台灣，無回應記者祝賀。


馬唯中喺哈佛大學讀生命科學系，之後就讀紐約大學博物館系，畢業後留喺美國，到國際爆破藝術專家蔡國強工作室工作。佢同夫婿係讀書時認識，舊年喺加州登記結婚，但係台灣國安單位一直都唔知佢哋拍拖以至結婚。


台補擺喜酒 馬英九唔得閒

個婚宴神神秘秘咁，可能係馬英九一直都好低調處理兩個女嘅私事，佢曾打趣話，「不能說大女兒的事，因為怕接到質問的電子郵件；不能說小女兒的事，因為怕她不打電話給我」。馬英九辦公室前日回應大女的婚禮就話，馬唯中確實有返台灣，但宴客屬於同學間嘅私人聚會，故不予評論。