政府諗過搞奶粉特賣場

【明報專訊】早前輿論支持政府修例限帶奶粉，後來有內地傳媒質疑新例好似「聯合國禁運」，搞到政府呢排忙到氣咳解畫。食衛局長高永文噚日出席立法會有關限帶奶粉會議，佢話政府曾經諗過創意方法解決奶粉荒，例如喺每區設特賣場，只賣畀港人，要持出世紙至可以買，自己做埋零售商。


建議最終當然無實行，局長話，首先唔知要搞幾多個特賣場，如果唔係全港都搞，又會引晒其他人排隊；更唔知有無人會借港人證件，前門買完後門散貨，解決唔到問題之餘仲會引起混亂。


形容政府出「小辣招」嘅新民黨葉劉淑儀，問點解新例只限帶兩罐奶粉。局長同葉太分析，話諗過不如限帶3罐，不過家帶1罐奶粉隨時可以賺80蚊，訂為兩罐係為咗提高帶水貨成本，又話除非離港好耐，否則兩罐奶粉應該夠BB食。