新聞類別
港聞
詳情#
【明報專訊】噚日係「三八婦女節」,Emily同所有姊妹一樣咁重視。香港婦女基金會就搞咗一個叫做「30% Club」嘅運動,請各大公司主席聯署加入,目標係所有公司嘅董事會都有三成董事係女性。下個禮拜四傍晚,婦基會喺亞洲協會金鐘總部有誓師大會,特首梁振英都會撐場發表演說,以示支持。
38公司主席聯署支持
搞手之一、香港婦女基金會董事關蕙話,目前已經有38間香港公司主席聯署,承諾公司會逐步增加女性董事比例到三成。呢38位主席包括恒隆陳啟宗、新世界鄭家純、電盈李澤楷、證監會唐家成、其士周亦卿、政壇紅人張震遠等。
關蕙話,早前港交所調查發現,香港1500間上市公司,只有16%董事會有女性,即係84%嘅董事會一個女人都冇。除咗爭取女性平權,佢話當年美國雷曼兄弟爆煲,就係因為雷曼董事會只有兄弟冇姊妹。多啲姊妹加入香港公司嘅董事會,可以令香港公司發展更健康、開會討論更周全,佢嘅目標係年底前有500間上市公司聯署加入。
留言 (0)