醫委會網站無睇頭

【明報專訊】醫委會近期擺咗個大烏龍，有個違規醫生明明有前科，但秘書處就話佢無，差啲搞到判輕咗。有委員知道後有微言，唔明點解會搞錯，仲話睇吓醫委會個網頁，就知有幾「out」。


Emily睇咗醫委會個網，確係唔係好追得上潮流，差不多係純文字版本咁。聽聞一年幾前，已經有委員提出要改個網，點知到家陣仲係唔能夠與時並進。至於違規醫生無前科呢單烏龍嘢，聽聞醫委會問過個律師有無專業責任，但係當時佢好似只係無出聲，而唔係刻意講大話，所以好難追究。


今後唯有每次都要問個律師同醫生有無前科，估計佢哋唔敢喺聆訊中講大話，以免醫務聆訊重蹈覆轍，擺咁大個烏龍。