30議員杯葛九巴春茗

【明報專訊】元朗區議會噚日同九巴春茗，42名議員只有單位數嘅人出席，其中一個係交委會主席陸頌雄。對於大約30名議員杯葛春茗，陸頌雄話呢啲都係議員嘅自由決定，大家都對巴士服務有意見，只係大家用唔同方法處理，目標係一致嘅，噚日餐飯大家氣氛無受影響咁話。


有份發起杯葛嘅議員李月民，就話唔明白點解有人自稱被迫參加杯葛行動，「若有人唔想加入，我憑乜嘢可以逼到人呢？」佢話，今次行動喺上周五起討論，短短幾日間，大家透過WhatsApp「兄弟聊天室」群組傾出嚟。大家參與程度好高，例如佢本來建議不如喺春茗搞抗議後再集體離場兼打小人，但有議員認為咁樣好似太激，最終佢都修改，唔存在一個人可以決定晒成件事。