張華峰記者面前掃港交所

【明報專訊】唔少人話港股進入「大時代」，雖然昨日開市時未有好似財政司長曾俊華估計咁裂口低開，但中午過後不斷跌，包括復活節過後累計升咗近100蚊嘅港交所（0388，昨收報272.6元），噚日亦下跌，向來推介人買港交所嘅金融服務界議員張華峰，噚日就繼續力捧港交所。佢同記者講，如果跌到270蚊，合埋眼入貨都定過抬油，佢仲身體力行，喺記者面前落盤，要喺268.8蚊入10萬股，即係總共斥資2688萬元。


林健鋒﹕跌勢未完

張華峰教路，買股市最緊要夠快、夠大手，又話港交所只會隨住成交愈來愈大而收入增加，根本唔需要擔心太多！即使講起政改，張華峰亦離唔開股票，佢話政改無論如何都係進步，普選落實就最好，仲話如果過咗普選，社會又可以專心發展經濟，即係港交所又可以繼續升喎。


其他議員方面，經民聯林健鋒對於噚日跌市就有嘢講，佢話由於之前股市急升咗唔少，所以唔會只跌一日咁少，相信呢個跌勢仲未完，所以佢噚日都無入貨咁話。


民主黨單仲偕就好有政治敏感度，佢認為做議員唔係所有股份都買得，所以手上只持有盈富基金之類的ETF股票，又表明自己一直都無買港交所，因為「無理由買完又監察同鬧佢」。單仲偕曾經幫匯豐銀行打工多年，當年都持有唔少匯豐，2008年底有一晚佢突然好驚輸晒阿仔啲學費，於是當時喺128蚊高位放晒所有貨，兩日後雷曼兄弟就爆煲，自此高位一去不返，佢都算好好彩！