車淑梅允捐遺體 當「入咗大學」

【明報專訊】香港大學醫學院噚日舉辦遺體捐贈日，資深傳媒人車淑梅、社會醫學系系主任梁卓偉都有出席，一齊公開簽署捐贈承諾書。車淑梅話自己一生最大嘅遺憾係無讀大學，家陣參加咗遺體捐贈，簡直係另一種入大學嘅機會，成為醫科生嘅「老師」，笑言「我諗我嗰日必定會笑住離開」。


醫學院裏面除咗有好多教授做老師，仲有唔少畀醫科生練習嘅遺體做「大體老師」。負責遺體捐贈計劃嘅陳立基醫生話，目前每年嘅自願捐贈者遺體只有數具，供應遠低於需求。做過食衛局副局長嘅梁卓偉噚日仲話，香港殮葬地少，捐遺體就唔使葬，仲可以令學生了解人體奧秘，延續教育學生嘅使命。


如果想捐遺體，方法好簡單，填表交畀醫學院就得，但緊記要通知家人呀，如果唔係，醫學院又點識得接收捐贈嘅遺體呢。


香港大學遺體捐贈計劃查詢電話：2819 9220