鄧竟成上京 6點睇升旗

【明報專訊】全國政協委員家喺北京開會，由於呢兩日佢哋都係下午先要開會，所以上晝通常都無乜嘢做，一係就個別坐埋傾吓偈，或者出外搵北京朋友呀咁。不過，曾經做過飛虎隊嘅前警務處長鄧竟成，退休後仍然有keep住做運動，原來上到北京都唔例外，佢已經連續兩日清晨由酒店急步行去天安門廣場睇升旗，又喺天安門行幾個圈當做運動。


天安門兜圈做運動

鄧sir話，佢喺香港都慣咗早睡早起，夜晚10點鐘就瞓覺，從來唔會睇電視劇，清晨4、5點起身，所以佢上到北京嘅第二朝，5點鐘就起身，去咗睇天安門喺6點都未夠就舉行嘅升旗；不過喺北京，由於都有好多朋友喺度，所以有唔少應酬，唔能夠好似喺香港咁10點可以瞓覺。


唐唐好dry 多得政府菊花茶

至於政協新丁、前政務司長唐英年到咗北京幾日，佢最大感受係覺得好乾燥，但笑言好彩特區政府有向政協提供菊花茶，唔知唐唐有冇帶定潤膚霜上北京用呢？

至於其他人大政協新丁點樣打發開會外嘅時間呢？原來唔少人都識得自得其樂。體型好fit嘅觀瀾湖主席朱鼎健，亦好似鄧竟成咁，每朝6點幾就去酒店健身室做運動；人大新丁黃友嘉就話，平時喺香港工作多應酬多，夜瞓運動少，到北京開會反而得閒咗，喺健身室一做就做咗個幾小時運動喇。