長者下晝愛按平安鐘

【明報專訊】近年政府日夜提住人口老化，今年踏入第17個年頭嘅長者安居協會都有唔少搞作，包括將總部由觀塘搬去何文田愛民邨。新總部高3層、佔地4.3萬呎，同領匯簽約9年，唔怕中途逼遷。


行政總裁梁淑儀（Irene）話，家長者唔鍾意被人叫「公公婆婆」，要改口叫「Uncle、Auntie」。為咗趕潮流，搬新辦公室後，會搞多啲社區活動，等後生仔同Uncle、Auntie多啲接觸。協會員工亦受惠於新大樓，Emily聽聞辦公室會議枱可以變身乒乓波枱，辦公室內仲有步行徑，員工都好期待。


為潮長者推平安手機

長者安居協會最廣為人知嘅係平安鐘，協會將推陳出新，最快會喺母親節推革新版，今年內因應潮長者推智能手機型嘅「平安手機」。唔講唔知，原來長者最鍾意下晝3點至5點按平安鐘，唔係呢個鐘數易生意外，而係佢哋個段時間最得閒，打上去同職員分享孫仔入咗幼稚園，甚至學咗首新粵曲要唱吓喎！