譚惠珠：吹哨判襲警正確

【明報專訊】警察員佐級協會噚日新春酒會，到場有警務處長曾偉雄，港區人大代表譚惠珠亦以創會會長身分出席。珠姐致辭時，提到舊年七一遊行有人向輔警吹口哨，結果被法庭裁定襲警罪成，認為決定正確之餘，亦係法官對警員堅忍、緊守崗位嘅一種認同，嗰堆終日搞事同無建設性嘅人，已經令市民好厭煩咁話。


一哥：執法者尊嚴不能侵犯

一哥就強調執法人員受法律保障係無可置疑，佢哋嘅尊嚴亦唔容許受侵犯，又話唔係以後唔吹得口哨，不過就唔可以藉吹口哨做襲擊行為。


協會主席陳祖光就大吐苦水，話做警察「唔止要做好呢份工」咁簡單，仲要被人以污言穢語斥罵，示威者惡形惡相嘅片段，一個周末都睇唔完咁講。佢又引用國家領導人名言，話要「容得下尖銳批評，做到有則改之、無則加勉；對黨外人士要敢於講真話，敢於講逆耳之言……」，要做個堂堂正正、有榮耀嘅中國人喎。