長毛：好多訟費未畀

【明報專訊】財爺曾俊華噚日喺立法會發表佢嘅第6份財政預算案，雖然佢話自己係中產，但係有唔少人批評話佢忽略中產。立法會議員攞8.5萬蚊人工，喺財爺眼中唔知算唔算中產，不過Emily都八卦想知預算案點樣令佢哋受惠。


住公屋嘅「長毛」梁國雄，收入超標屬富戶一族，相信都係其中一個受惠項目較多嘅議員，包括退還薪俸稅、公屋免租慳1900蚊、寬免差餉同電費補貼，Emily估計佢因此可慳1.4萬。不過，佢話仲有好多訟費未畀，相信呢筆意外之財只係杯水車薪。佢同Emily講，呢啲紓困措施實在小恩小惠，覺得搞全民退保，人人受惠就好。


陳家洛1.2萬蚊入袋

多仔公嘅公民黨陳家洛，可能係受惠單一項目最多嘅議員，財爺將子女免稅額由6.3萬蚊提高至7萬，家洛有4女1仔，淨係子女免稅額都多咗3.5萬，又有退還薪俸稅1萬同電費補貼等。不過，佢上年10月做議員，薪金連大學副教授呢份，收入多咗唔少，一加一減，有無着數好難講，但退稅連電費補貼等，粗略估算得1.2萬入袋。家洛話，佢上有高堂下有妻房，1個人養10個人，不過身為中產都有能力照顧自己，寧願政府將錢用喺教育、房屋、退休保障。


同屋企人住自置單位嘅新晉議員工聯會郭偉強，就好過租樓嘅醫學界梁家騮，全因郭偉強應可獲寬免差餉成2800蚊，梁就無份，不過梁多得有一對仔女，多咗1.4萬免稅額，估計可慳2000蚊稅，加埋退還1萬薪俸稅同電費補貼，有1.38萬，而郭偉強就大概受惠1.46萬。