舊歌改詞窒「中產」財爺

【明報專訊】「你有你的生活，我有我的忙碌」，噚日財政司長曾俊華喺財政預算案結尾時爆出呢句「金句」，查實呢句係80年代歌手曾路得主唱嘅《天各一方》歌詞中嘅旁白。財爺靠歌寄意，話香港社會雖然喧鬧、多變，但每個人都可以自由抉擇，有更好明天。但唔夠半日，就有網民藉新歌詞批評財爺，質疑佢緊「40皮（每月近40萬的薪金）」都自認中產，又話就算偶然喺政總撞到財爺，對方都「只係知道 喺呢一剎那 我富貴過你」。


網民譏月「40皮」

呢首《天各一方》當年紅極一時，近排連一個健康食品廣告都用咗呢句旁白。財爺可能見到反應唔錯，就嚟一招「靠歌寄意」，話香港雖然好多人好似各不相干，但只有共同信念，即可「凝聚成一股推動香港一直向前的力量」喎。


毛孟靜：與市民期望「天各一方」

不過，泛民議員好似唔係咁受落，公民黨毛孟靜就喺記者會上，話查實係財爺同市民期望「天各一方」先至真。新民主同盟范國威更改埋圖，話曾俊華延續上屆政府嘅「守財」作風，對長遠解決本港民生問題缺乏承擔，諷刺財爺係「我有我的守財，你有你的困苦」。


可能財爺都知衰，噚晚出席電視論壇時，話只想講自己「喺中產家庭長大」，講咁多嘢只係強調一點，就係自己了解中產情况。唔知網民又收唔收貨呢？