湯家驊內地探親先知會「阿爺」

【明報專訊】公民黨立法會議員湯家驊（Ronny）噚日自爆返內地要問「阿爺」。佢話幾個月前同家人一齊去上海探弟弟，啟程前特別知會中方一聲，費事去到上海被拒入境，為家人帶嚟麻煩。


Ronny噚日出席民主黨主席劉慧卿嘅網台節目《議會內外》做訪問。卿姐問咩人有資格參加下星期大律師公會嘅訪京團，Ronny就話無規定，有興趣參加嘅大律師都可以報名。卿姐笑言，「叫（民主黨創黨主席）李柱銘擺個名去試吓。」


不過，Ronny提到自己2011年隨大律師公會團赴京時，就試過被拒入境，形容自己係「敏感人物」，仲自爆之前去上海探親，事先通知中方一聲。卿姐聽到好驚訝，「唔明點解要問（中方）」。Ronny就話唔係要拎批准，而係了解返內地會否有困難。佢話一家大細一齊去，有咩事入唔到境，會好為難。


Emily記得，去年佔領期間，Ronny就試過返深圳西麗湖打golf，仲撞到港澳辦主任王光亞。唔知嗰次Ronny有無事先知會「阿爺」呢？