打造港版東大門

【明報專訊】內地生產成本上升，喺內地設廠嘅港商都要諗出路，香港青年工業家協會今年舉辦香港工商業獎，增設升級轉型組別，鼓勵同表揚企業透過升級轉型計劃，變革核心業務去適應市場同經營環境嘅轉變。香港首間由內地回流嘅成衣中心，相信會係一個好例子。身兼香港青年工業家協會副會長、興迅實業董事總經理張益麟透露，公司喺荃灣TML廣場買咗約8萬方呎單位，會喺6月投入運作，集合產品設計、數碼印刷、成衣生產同時裝批發一條龍服務。


引入數碼印刷 小訂單都可生產

張益麟話，公司喺內地嘅廠房會繼續運作，但面對生產成本上升，港商都要諗計升級同轉型，興迅喺香港請過百個車衣女工，又會同本地設計師合作，引入數碼印刷技術，大大縮短印花時間，最大特點係香港生產，接小量訂單都可以生產，夠晒靈活，深信「香港製造」有吸引力，唔係點會有咁多人湧到香港買奶粉。佢話知道南豐計劃活化區內南豐紗廠，變身時裝設計師培育中心，到時可以有協同效應，有信心將設計中心打造成韓國東大門嘅時裝批發中心，長遠推動本港成衣業發展。