曾被搶無陰影 劉慧卿照去日內瓦

【明報專訊】民主黨主席劉慧卿上次去日內瓦出席聯合國人權事務委員會會議，畀賊搶咗手袋，但卿姐似乎驚都未驚過，為咗民主大業，下個月會再去日內瓦，投訴中央干預香港內政。


出席會議爭人權

卿姐屆時會就中央干預、普選訴求、警權過大同性別平權等方面向聯合國人權事務委員會提建議，批評中央多名官員近期嘅發言都冇維護一國兩制，又會譴責特區政府冇捍衛香港嘅高度自治、對種票事件愛理不理，又令言論同新聞自由受到前所未有嘅衝擊。


卿姐噚日又同記者談論泛民為政改成立嘅新平台，卿姐就強調民主黨願意同各黨派傾，但大前提係無人可以攻擊同抹黑，而黨內仲未傾過係咪贊成「超級區議員」何俊仁辭職，幫政改方案觸發全港公投。佢又話，民主黨黨內部好多人都支持港大法律學者戴耀廷提出嘅佔領中環行動，後日民主黨會開中委會再討論。