防林奮強事件重演 行會推辣招特別安排

【明報專訊】財政司長曾俊華上星期五宣布將物業印花稅加倍，想遏抑樓市，當日召開特別行政會議討論同通過新措施。上年10月政府推額外印花稅，行會成員林奮強就喺措施推出之前賣樓，最終搞到佢要無限期休假等候廉署調查。政府為咗避免事件重演，據聞當日開行會前，特別問晒所有行會成員究竟有無利益衝突，有無同地產建築公司有關係、或者擔任執行董事咁，據聞當日有差唔多一半嘅行會成員要避席。政府為咗確保政策公布前保密，當日行會成員亦要「留堂」直到財爺開記者會，政府當然無刻薄佢哋，為行會成員提供墨魚丸同三文治等小食。


40歲首置業 葉太：年輕人買樓唔使急

政府辣招有無效，大家仲要觀望，但係新民黨主席葉劉淑儀就覺得，其實年輕人根本唔需要急於買樓，仲話近年社會嘅價值觀有改變，點會諗到家20幾歲人就話買樓，甚至大學生都去排公屋呢？葉太自爆當年成40歲先首次置業，過去一直住喺老公度，當時樓價只係2000幾蚊呎，到佢1997年賣出單位，已經升到成8000蚊呎。葉太估計，未來幾年只要有多啲供應，加上隨時有可能加息，樓市自然唔會咁熾熱。


本身住喺寶雲道嘅葉太話，喺馬己仙峽道亦有物業用嚟收租，佢話原來前高官馬時亨早前亦有意做佢租客，但係物業一早已租出。佢仲笑住講，當年同民主黨創黨主席李柱銘係鄰居，當年葉太仲係高官，有時都幾擔心政府啲機密文件會送錯去對方嗰度。