聽歌讀書雜食 足球獨愛阿仙奴

【明報專訊】球衣、唱片、法律典籍……大律師公會主席石永泰簇新的辦公室滿布成長印記，猶如家中房間。聽音樂橫跨廟街到演奏廳，閱報紙覆蓋左中右，唯獨足球愛阿仙奴愛到朗朗上口，說起愛隊滔滔不絕。


最愛孤星淚 欣賞尹光

石永泰的書籍典冊周圍放，唱片櫃至少放了近千隻唱片，「只係一部分」。他笑言會在辦公室放音樂，種類繁多五味紛陳。管弦樂與爵士樂中埋藏中日歐西流行曲。石雖說自己聽「七八十年代」，「中島美雪又係我女神」，但架上不難找到首輪派台作品，「方大同係自己買㗎。」。最愛是誰？石想起的全來自留學英國那段想家日子，看過的劇聽過的歌同樣難忘。他最愛《孤星淚》，「睇親都喊」，「89年7月睇第3次，嗰陣六四之後，講類似嘅嘢，類似嘅情懷」 。


至於本地薑，他說負笈英國時興聽尹光與夏金城，「『荷里活』、『小矮人』嗰啲，尹光聲底幾好」，坦言「3月尹光開騷，應該會入場」，又即席唱了兩句夏金城「為了靚靚每日照鏡」。


石永泰說他每個早上看遍左中右報章，書籍亦然，「陳雲、陶傑、劉迺強，『香港藍皮書』，乜都睇」。不踢球但愛足球，只愛阿仙奴，「1971年阿仙奴第一次攞double（聯賽及足總盃雙料冠軍）」，甚至可以準確說出奪冠時刻，他又說近年阿仙奴「成也雲格敗也雲格」，對轉投死敵曼聯的尹佩斯則「留一線」，「佢有品，唔似艾迪巴約，跑半場撩舊隊球迷，真係『摟打』」。