政商教界熱捧渣馬

【明報專訊】渣打馬拉松噚日舉行，唔少政商界名人都有參賽郁吓，好似立法會資訊科技界嘅莫乃光就參加半馬拉松，佢喺facebook話最終用咗2小時39分鐘完成，比兩年前參加慢咗10分鐘，但覺得喺缺乏訓練下都有咁嘅成績，算係咁。


57歲嘅體育、演藝、文化及出版界議員馬逢國首次參加10公里賽，Emily上星期喺新春酒會見到佢行路幾辛苦，當時佢話練跑扭親腳，最終噚日亦有上陣，完成10公里，用咗幾多時間？馬逢國就話「跑完就是勝利」。至於跑咗十幾年全馬嘅街工梁耀忠今年就做領跑員，陪住視障男跑手參加半馬。


參加2公里領袖盃嘅就有九龍倉主席吳光正、醫管局主席胡定旭、發展局長陳茂波、商務及經濟發展局長蘇錦樑、民主黨涂謹申同單仲偕、民協馮檢基等。大學校長亦有現身賽道，城大校長郭位已經連續第5年參加10公里賽，城大亦有逾千個師生校友等參賽。港大校長徐立之亦參與領袖盃。


譚香文賽道影相上fb

另外，部分人比賽途中影相自拍，其實會影響到其他健兒，連前立法會議員譚香文亦有喺賽道影相，相片放上facebook，佢第3年參加10公里賽，希望佢影相時無阻住其他人啦。