長毛即變斯文

【明報專訊】社民連「長毛」梁國雄噚日喺立法會財務委員會開會期間，喺立法會走廊同人民力量黃毓民月旦政事，講到建制派決意收緊財會議事規則「剪布」時，夾雜咗啲「兒童不宜」嘅說話。喺呢個時候，幾十名樂善堂梁銶琚學校嘅小六學生現身參觀立法會，長毛喺記者提醒下即時收口，更主動走去同班小朋友打招呼。


呢班小朋友見到長毛（右）相當興奮，爭住同佢影相兼握手，又問佢「How are you」。長毛就大讚小朋友英文講得好，仲叫佢哋努力讀書。呢班小朋友嘅熱情似乎得長毛好開心，佢事後仲沾沾自喜講﹕「我係有票支持㗎！」