夢熊出演「一代粉絲」

【明報專訊】劉夢熊（dream bear）噚日去港台新一輯《頭條新聞》做首集嘉賓，節目下周五播出，借用電影《一代宗師》，變做「一代粉絲」，話「作為粉絲，係要付出時間同精神」。喺節目裏面聲稱係北拳「熊拳」傳人嘅dream bear化身評論員，對於中聯辦主任張曉明話「不說傷感情的話、不做傷感情的事」，dream bear話張曉明呢位「大教頭」走馬上任，要化解而唔係激化矛盾，係有的放矢。至於佢自己有無同人「傷過感情」，dream bear就話要「向前看，唔好耿耿於懷」。


張曉明話民間對CY滿意度遠比傳媒評論好，dream bear就話民望係客觀反映，政府民望高嗰時就話民情反映輿情，質疑係咪「輸打贏要」，又勸政府唔好「鴕鳥政策」。佢話做領導人唔使太叻，好似佢「祖先」劉邦，最緊要識得搵人，「善於團結香港一流人才，組成有戰鬥力班子」咁話。