兩會新丁要上堂

【明報專訊】人大政協會議由朝開到晚，過去部分委員曾被傳媒影到不敵睡魔、同周公見面嘅情况。今年人大政協換屆，新丁湧現，中聯辦近日舉辦兩場「交流會」，教大家「如何做個好委員」。


新任全國政協委員嘅廠商會會長施榮懷噚日出席廠商會春茗時透露，中聯辦日前喺深圳舉辦活動，邀請人大、政協新丁參加，提醒佢哋做委員嘅規條，包括唔好喺開會期間「飛來飛去」、缺席會議，亦唔好開會瞌眼瞓等。中聯辦今日亦會舉行多一場人大政協交流會，畀大家上京前交流一下。