中聯辦打貪 政界讚環保

【明報專訊】中聯辦主任張曉明發表「打貪論」，講明上任後會緊跟中共總書記習近平路線嚴打貪腐，唔畀中聯辦人員收受禮金同禮物，連果籃都唔收得。言論一出，政界議論紛紛，全國政協常委陳永棋話唔收果籃唔單止打貪，仲非常環保，事關佢年年聖誕收到嘅果籃，多到食極都食唔晒。


陳永棋﹕每年收果籃 多到食唔晒

內地貪腐嚴重，咁過去有冇人曾以各種利益買一個人代或政協嚟做呢？新任港區人大代表張明敏就話相信有，但認為大家毋須過分解讀張曉明嘅言論。


美國駐港總領事楊甦棣仲搞笑，一聽到「打貪論」就講笑大叫「terrible」，話早喺佢加入美國政府前，美國已經有規則唔畀官員收禮，至於內地嘅做法係咪太遲，就要交由中方回應。


中總新任會長楊釗就同Emily講，內地經濟發展至今出現貧富懸殊，同意中央開始盡量減少宴會收禮，「先富起來嘅人要檢點」，無謂增加社會矛盾，仲話張曉明之前到訪中總，當日都無送紀念品。


田少中聯辦拜年 「果籃都無帶」

自由黨噚日去中聯辦拜年，榮譽主席田北俊話佢哋連果籃都冇帶去，但強調過去幾年拜年都唔送嘢，同「打貪論」無關係。中聯辦協調部長沈沖話，張曉明嘅言論唔會影響佢交朋友。