浸大團拜不忘地皮

【明報專訊】浸大一直力爭政府前專教院李惠利校園建中醫教學醫院，校長陳新滋噚日出席春茗時話，「地皮建中醫院，比建豪宅適合100倍以上」，道理上亦百分百應撥畀浸大，仲話未見過有國家或地區教育用地好似香港咁少，會繼續全力爭地。


佢話，李惠利嗰半塊地皮，最多起到400個單位，根本解決唔到本港房屋問題，覺得不如留畀浸大用仲好；不過，政府畀其他地浸大起中醫院，浸大都會要。現時浸大已交計劃書畀政府，預計起中醫院要8億至10億元，現時已有人應承捐錢畀浸大起嘞。


校長：已有人願捐錢起中醫院

陳校長之前提過，拎唔到李惠利塊地就會辭職，佢噚日強調唔係要脅政府，只係佢嘅自我要求。因為佢覺得作為校長，如果努力咗都做得唔好，應該承擔所有責任，唔應該繼續做落去咁話。