譚香文「騎」電單車

【明報專訊】潮流興改圖，黃大仙區議員譚香文喺「成功爭取」單張都玩改圖，話說單張係講佢成功爭取到區內設電單車停車位，譚香文嘅助理就將譚香文企喺度嘅相，同電單車key埋一齊，驟眼睇落佢好似騎喺電單車上面。


譚香文話呢個係助理搞笑咁整上去，一睇就知係假嘢。佢話自己冇電單車牌，不過有英國嘅國際車牌，可以喺英國揸私家車，但喺香港就無車牌。


問佢點解唔喺香港攞番個車牌，佢話唔敢喺香港揸車，因為英國啲路好闊，佢揸慣啲寬敞嘅路，香港啲路太窄，佢唔夠膽揸，怕唔小心撞親人，或者整花架車。