為奪芳心不遺餘力 陳茂波租屋追女仔

【明報專訊】發展局長陳茂波噚日出席「賽馬會美荷樓香港精神學習計劃」講座，除咗向40個中四生分享自己成長奮鬥經歷，仲教細路追女仔，講當年追求太太許步明嘅「成功心得」。陳茂波話，太太係佢大學嘅師妹，嗰陣已一見鍾情，於是採取「全天候跟隨」嘅追求策略，即係無論去到飯堂定圖書館都跟到足，茂波好滿意話就係咁打動芳心，拍拖仲好穩定。


追女仔經勉勵青年勿輕言放棄

但係，陳茂波話當年去見家長嗰關就有阻滯，自己係潮州人，嗰陣又留長頭髮成個飛仔咁，搞到伯母話「潮州人打老婆㗎喎」，唔放心將個女交託畀佢，後來女方由深水埗舉家搬到薄扶林，嗰時交通唔方便，陳茂波就決定搬去同一大廈嘅女家親戚租房，如是者除咗可以同女友出雙入對，仲多咗機會到女家幫手洗碗同做家務，加番唔少印象分，最終如願抱得美人歸。講追女仔經，原來呀局長無非想勉勵青年，話做人唔好咁容易放棄喎。


不過，陳茂波話，當年因為少返自己屋企，又啱啱投身社會「拼搏期」，點知母親突然確診腦癌，病發唔到一年就過身，唔可以同母親共處更多時間，成為佢人生一大憾事，令佢反思自己人生優先所需，開始信主，仲話信仰提點當自己位置有影響力同權力，唔好忘記要為社會最卑微一群服務同伸張正義。