記協拍短片 諷入政總要過6關

【明報專訊】政府總部叫「門常開」，但對採訪記者嚟講恍如「門常關」，記者協會最近拍咗套短片《六度門》，等大家關注政府總部嘅唔合理規定。套短片講乜嘢？就係記者由政府東翼大堂走去西翼大堂追訪官員，要迂迴咁經過6道大門，但官員就可以另走直接通道甩身。


曾志豪扮「僭建局長」

短片搵咗港台節目主持曾志豪扮演「僭建局長」，前記者柳俊江扮演新聞官，記協前總幹事莊曉陽同埋記者姚國雄就扮演記者。劇情講僭建局長畀記者追問下尷尬敗走，由新聞官護駕離開，局長就走地下大堂嘅職員通道，直接由東翼走到西翼，記者就喺新聞官帶領下要經過6道門，最終當然係追唔上局長啦。


真保安「客串」

記協一直爭取政府開放職員通道畀記者，但政府堅決唔肯，所以記協先至拍短片施壓。片中除咗4個演員外，仲有好多保安，不過呢啲保安係真保安，仲喺拍攝過程中阻止記者進入高官停車場區域，唔係演戲㗎！


大家有興趣可以上YouTube搜尋「香港記者協會《六度門》短片」。