會師中環：財演又被跣一鑊

【蘋果日報】數過去兩個月，港股其中一個焦點就是騰訊（700），470元高位、大股東減持、回調兩成進入技術性熊市，到本周三的對辦業績、ADR升6%，令一眾財演追到氣咳。猶記得年頭眾財演目標價劍指500元，然後到上星期又出現「360元先好撈貨」、「股王不再」等論調，甚至連有冇夢想都成為股價低迷的原因，一眾財演轉軚飄移嘅技術仲勁過頭文字D。
老實說，估錯邊人之常情，股神畢菲特亦買了IBM、錯過了亞馬遜，投資錯誤絕對沒甚麼大不了，但嗰種見升叫升、見跌叫跌嘅分析，仲要事後博人唔記得，再扮食晒所有浪嘅做法，這種厚顏無恥實在令人鄙視。
更重要嘅係，唔少散戶都好信任呢啲財演，靠佢哋分析做功課，結果就淪落到高買低賣的下場，實屬害人不淺。其實股神畢菲特，甚至前排上報紙的長和股神，早就證明要靠投資獲利，挑選好股並長期持有遠比捕捉市場轉角位可取，所以你唔會見股神好似班財演咁日日上報紙寫「給股東的信」，因為賺錢嘅投資策略分析係冇可能日日唔同，只有財演為了日日交稿，噚日睇牛今日睇熊，甚至用call對沖put，導致人格分裂一樣。話時話，今次騰訊季績發佈後，又唔知有幾多財演又轉軚，同幾多投行降完目標價又要升返。咁樣轉軚法，真係望到都覺尷尬。
神仙丁
《審計搵丁》負責人
http://facebook.com/AuditSlave/
本欄逢周五刊出