李慧琼也做怪獸家長

【明報專訊】香港地生活壓力大，夫婦既要照顧小朋友，仲要應付工作，絕非易事。民建聯家庭事務委員會正做緊一項年輕家庭專題研究，身兼委員會主席嘅李慧琼（Starry）就自爆，佢做咗超級區議員後工作量大增，同屋企人相處時間少咗，而為讓囡囡入一間好學校，佢亦被迫走上「怪獸家長」之路。


Starry話，自己曾經好抗拒做怪獸家長，但眼見其他小朋友細細個就有「履歷表」，最終只得屈服，安排囡囡去學「一體一藝一語文」，亦即係游水、鋼琴同普通話。


民建聯「多仔公」深水埗區議員鄭泳舜就話，學校每年舉行兩次家長會，佢有3個仔，即係要去6次，佢話如果政府可以效法英國同加拿大咁增設家長假就好喇。講番呢個研究，佢哋發現有四分之三嘅年輕家庭係雙職父母，有多達63%父親同39%母親每日陪伴子女時間少於2個鐘，建議政府加強支援雙職家庭。